Deuteronomy 32

1Guba e, a hakala, lau baina hereva;
Tanobada e, lau udugu herevadia ba kamonaidia.
2Egu hahediba na medu na heto baine diho,
Egu hereva na hunu na heto baine hedinarai,
Medumedu rei matamata latanai na heto,
Medu hetuturu aniani avadia latadiai na heto.
3Badina be Iehova ladana baina heatolaia;
Eda Dirava ba imodaia.
4Ia na Nadi-ginina; ena ḡaukara na ḡoeva-dae;
Ena dala iboudiai na hahemaoro daladia.
Ia na heabidadama Diravana, asi ena kara dika;
Ia na momokani bona maoromaoro.
5Idia na ia vairanai vada e kara havara,
Idia na dia ia natuna, badina be idia na mai bebeka-bebekadia,
Idia na daḡedaḡe uruna, uru gageva-gagevana.
6Kavakava bona laloduhu taumui!
Iehova na ene o kara henia tomamu a?
Ia na dia oi tamamu a? Mauri se henimu a?
Ia ese e karamu, bona e haginimu.
7Nega gunadia ba lalodia,
Uru momo edia mauri laḡanidia ba haero.
Tamamu ba nanadaia, ia ese baine hadibamu,
Tau badadia ba nanadaidia, idia ese bae hamaoromu.
8Herea Mikamika ese bese ta ta ahudia e henidia negana ai,
Taunimanima natudia e hapararadia negana ai,
Ia ese taunimanima edia tano hetoadia e henidia,
Israel garana edia hoho heḡereḡeredia.
9Badina be Iehova ahuna na ena bese,
Ia dihina na Iakob.
10Ia ese tano ḡaḡaena ai e davaria,
Tano gesegesena ai e davaria.
E dosia bona e reḡua,
E gimaia, ta ese matana nadinadina e gimaiamu na heto;
11Ugava na heto, natuna e harohodiamu negana ai,
Idia daediai e roho taomu,
Bena hanidia e toi roromu,
Latadiai e hahelaidia kaumu.
12Iehova sibona ese e hakaua,
Dirava idauna ta ese se bamoa.
13Tanobada latalatana ai ena laolao ai e siaia lao,
Uda anianidia e aniva.
Nadi amo bada ranuna e henia,
Nadi aukana amo dehoro e henia.
14Boromakau batana bona mamoe ratana,
Bona mamoe natudia mamoe mamaruanedia digaradia;
Basan boromakaudia bona nani.
Uit namo-hereana o ania,
Vine ranuna, rara hetomana, o inua.
15A Iesurunu ▼

▼Iesurunu na Israel ladana ta.

na tauna e bada, e daḡedaḡe.
Taumu vada e bada, vada o hedai rumurumu, vada o ḡaubadabada.
Bena e karaia Diravana vada e rakatania,
Ena mauri Nadi-ginina e dadaraia.
16Idia ese dirava idaudia amo e havaḡeḡea,
Kara havara amo e habadua.
17Lauma dikadia e boudia, idia na dia Dirava,
Asi dibadia diravadia e boudia,
Dirava matamatadia, vanegai mo e davaridia, bena ma e boudia;
Tamamui ese asie matauraidia diravadia bunu.
18E havaramu Papapapana so laloa,
E karamu Diravana o reaia.
19Iehova ese e itaia, bena e dadaraidia,
Natuna mamaruanedia bona hahinedia edia daḡedaḡe karadia daidiai.
20Eto, Vairagu na edia amo baina hunia
Baina itadia, ede bae hadoko toma;
Badina be idia na daḡedaḡe uruna,
Asi edia heabidadama memerodia.
21Edia dirava asi anina amo vada e havaḡeḡegu,
Edia kaivakuku amo vada e habadugu.
A lau ese orea asi anina amo baina havaḡeḡedia,
Bona bese kavakavana amo baina habadudia.
22Badina be egu badu ese lahi vada e havaraia,
Mase taudia edia gabu dobu-hereadia ai e aramu,
Tanobada mai anina ida e araia oremu,
Ororo badi-tanodia e doudiamu.
23Dika idau-idau na idia latadiai baina senu senu kau,
Egu diba baina ha-ore idia latadiai.
24Hitolo ese baine havarodadia,
Lahi siahudia ese baine aladia,
Mase goreredia ese bae hamasedia.
Uda ḡaudia edia hekori na latadiai baina siaidia,
Bona e raumu ḡaudia edia mase muramurana.
25Murimuri ai dare ese baine aladia,
Ruma lalonai gari ese baine butudia tao.
Tauhau bona hane-ulato bae mase,
Rata e inuamu merona bona iahu danu.
26Bama toma “Baina hakarohodia rohoroho,
bona ilalotaodia na taunimanima bogaragidia amo baina hadokoa”;
27A inaidia edia hevaseha herevadia garidia na gari,
Inaidia bema lalo hadai kerere na garina,
Bema toma “Ai imamai vada e kwalimu,
a Iehova ese ḡau ta se karaia”.
28Badina be idia na dia aonega besena,
Lalodia na asie pararamu.
29Bema mai aonegadia, lalodia bema parara,
Bona edia dina gabedia ede bae heto na bema diba.
30Ta ese daha-ta ede bema luludia toma?
Rarua ese gerebu-ta ede bema hahavadia toma?
Dala tamona mo: edia Nadi-ginina ese vada e rakatanidia dainai,
Iehova ese vada e negedia daure dainai.
31Badina be edia nadi-ginina be dia iseda Nadi-ginina heḡereḡerena,
Inaida na hahemaoro taudia ai vada ela.
32Badina be edia vine na Sodoma ena vine na heto,
Gomora ena vine imeana amo.
Edia vine huahuadia na didika,
Edia vine takodia na i'idita.
33Edia vine ranuna na gaigai edia mase muramurana na heto,
Gaigai edia mase hekorina na heto.
34Ina na dia lauegu roge ai a?
Ina na dia lauegu kohu namodia ida basine helaoahu a?
35Dika davana be lau imagu ai, bona namo davana danu,
Aedia bae dedi dinana ai.
Badina be edia hekwakwanai dinana na kahikahi,
Ediai baine vara ḡauna baine hedinarai taku.
36Iehova ese ena bese taudia maorodia baine gwaurai,
bona ena hesiai taudia baine bogadia hisi,
Baine itadia, edia goada vada e ore bona
tau ta dia noho, iḡui ai eiava murimuri ai, una negana ai.
37Ia na baineto, Edia dirava na edeseni ai?
E abidadama heniamu nadi-ginina na edeseni ai?
38Edia boubou ḡaudia digaradia e ani
bona edia inuinu bouboudia vine-ranudia e inu
diravadia be edeseni ai?
Idia bae tore isi, bae durumui;
Idia ese bae gimamui.
39Harihari a itaia, lau binai Dirava;
Dirava ta lasi, lau mo sibogu.
Lau ese na aladiamu, bona na hamauridiamu;
Na haberodiamu, bona edia bero na kumidiamu;
Asi tauna ta ese lau imagu amo baine hamauridia.
40Badina be imagu na duduia isimu atai ai,
Na tomu: Na noho hanaihanaimu heḡereḡerena,
41Egu dare kiama-kiamana baina segea,
Bona imagu amo hahemaoro baina karaia, negana ai,
E tuari henigumu taudia davadia baina heni,
E dainai henigumu taudia davadia baina heni.
42Egu diba na rara baina ha-inudia loulou,
Egu dare ese hidio baine ani,
Mase taudia bona abi-mauri taudia raradia bunu,
Hui lata taudia kwaradia bunu.
43Bese idau-idau e, iena bese ba imodaia!
Badina be ena hesiai taudia raradia davana e abiamu,
Ia inaina davadia e henidiamu;
Ena tano ena dika e abia ohomu, ena bese taudia daidiai.
44Mose na ema, ina ane herevadia iboudiai e gwaurai hedinarai taunimanima vairadiai, ia bona Iosua Nunu ese.

45Mose ese ina hereva na Israel taudia iboudiai e hamaorolaidia vaitani, 46bena ma eto: Hari dina ai vada na haḡanilaimui herevadia iboudiai na ba Ialodia tao; natumui danu ba hadibalaidia, bena idia ese ina taravatu ena hereva iboudiai bae badinadia bona karadia bae kara. 47Badina be ina na dia ḡau pipikina emui ai. Ina na emui mauri; ia dainai emui mauri dinadia bae hoho, Ioridane sinavaina unukahana ai bavabia bona emui tano ai ba halaoa tanona lalonai.

48Una dina ai Iehova ese Mose e hereva henia, eto, 49Abarim ororona ai ba dara dae. (Una ba Nebo ororona, Moab tanona ai, Ieriko hegaga hehenina ai.) Unu amo ba roha lao, Kanaan tanona, Israel taudia baina henidia edia tano ai bae halaoa tanona, ba itaia. 50Bena ba dara dae ororona ai ba mase, tubu tama dekedia ba hahebou, Horo ororona ai kakamu Aaron e mase bona tubu tama dekediai e hahebou heḡereḡerena. 51Badina be Israel taudia vairadiai o gwau edeede henigu, Meribata-kade ranudia badibadidiai, Sin tano-ḡaḡaena ai; bona asio hahelaḡagu Israel taudia bogaragidiai. Taunabunai tano ba itaia vairamu ai; a Israel taudia na henidiamu tanona na basio lao henia bona lalonai basio raka vareai.

52

Mose ena Hahenamo